Dinamalar

பிளாஷ்பேக் : பொன்விழா ஆண்டில் அன்னக்கிளி, இளையராஜா

1976ம் ஆண்டு இதேநாளில் வெளிவந்த 'அன்னக்கிளி' தனது 49 வருடத்தை முடித்து இன்று முதல் பொன்விழாவில் அடி எடுத்து வைக்கிறது. தமிழ் சினிமாவின் மைல்கல்லை உருவாக்கிய தயாரிப்பாளர் பஞ்சு அருணாசலம், கதை, திரைக்கதை, வசனம் எழுதிய செல்வராஜ், இசை சாம்ராஜ்யத்தை ஆரம்பித்த இளையராஜா ஆகியோருக்கு முதலில் வாழ்த்துக்கள்.

தான் நேசித்தவனுக்காக உயிரையே கொடுத்த ஒரு பெண்ணின் எளிய கதை தான் அன்னக்கிளி. அதை கிராமிய பின்னணியில் உருவாக்கி இருந்தார்கள் இயக்குனர்கள் தேவராஜ் - மோகன். ஹிந்தி பாடல்கள் கலக்கி கொண்டிருந்த காலத்தில் தமிழ் பாடல்களுக்கு குறிப்பாக, கிராமத்து இசைக்கு முக்கியத்துவம் கொடுத்து ஒரு படத்தை எடுக்க வேண்டும் என்ற ஆர்வம் கொண்டிருந்த பஞ்சு அருணாசலத்திற்கு அமைந்தார் ராசையா.

தி.நகரின் பேரூந்து நிலைய அருகிலுள்ள 'கிளப் ஹவுஸ்' ஓட்டலில் பஞ்சு அருணாசலத்தைச் சந்திக்க ராசய்யாவும், அவர் அண்ணன் பாஸ்கரும், வசனகர்த்தா செல்வராஜால் அழைத்து வரப்படுகிறார்கள். பஞ்சு அருணாசலத்தைச் சுற்றியுள்ளவர்களோ புதியவர்களை ஏற்கக் கூடாது எனத் தூபம் போடுகிறார்கள். 'மருத்துவச்சி', 'சூடிக் கொடுத்தாள்' போன்ற தலைப்புகளே படத்திற்காகத் தேர்வு செய்யப்பட்டிருந்த நிலையில், ராசய்யா தன் ஹார்மோனியத்தில் 'அன்னக்கிளி உன்னைத் தேடுதே' என்று இசைக்க, அதையே தலைப்பாக்கினார் பஞ்சு. திறமைக்கு மதிப்பளித்து, ராசய்யாவை இளையராஜாவாக்கினார்.

சுஜாதா, சிவக்குமார், 'படாபட்' ஜெயலட்சுமி, ஸ்ரீகாந்த், 'தேங்கை' சீனிவாசன், எஸ்.வி.சுப்பையா, எஸ்.என்.லட்சுமி, மணிமாலா, 'வெண்ணிராடை' மூர்த்தி, ஆகியோர் நடித்தார்கள்.

எஸ்.பி. தமிழரசி தனது எஸ்.பி.டி பிலிம்ஸ் நிறுவனத்தின் கீழ் தயாரித்தார், கதை எழுதியவர் ஆர்.செல்வராஜ். திரைக்கதை, வசனம் மற்றும் பாடல் வரிகளை பஞ்சு அருணாச்சலம் எழுதினார். ஏ. சோமசுந்தரம் ஒளிப்பதிவு செய்தார். படத்தின் பெரும்பகுதியை உண்மையான கிராமப்புற இடங்களில் படமாக்கினார், கருப்பு வெள்ளையிலேயே வண்ணங்களை உருவாக்கினார்.

மாநில மொழிப்படத்திற்கான தேசிய விருது பெற்ற இப்படம், திரையிடப்பட்ட உடனேயே பெரும் வெற்றி வரவில்லை. அப்போது தமிழகம் முழுவதும் ஒலித்த இளையராஜாவின் பாடல்கள் மக்களை தியேட்டருக்கு எடுத்து வந்து அமர்த்தியது. பொன்விழா ஆண்டிற்கு வந்திருக்கும் அன்னக்கிளி அப்போது வெள்ளி விழா கொண்டாடினாள்.

அதேப்போல் அன்னக்கிளி படம் மூலம் இசையமைப்பாளராக அறிமுகமான இளையராஜாவிற்கும் இது பொன்விழா ஆண்டு என்பது குறிப்பிடத்தக்கது.

• 
  5 வருடத்திற்கு பிறகு பாஸ்போர்ட்டை திரும்பப்பெற்ற ரியா சக்கரவர்த்தி
• 
  மகளின் நிர்வாண புகைப்படத்தை அனுப்ப சொன்னார்கள் : அக்ஷய் குமார் அதிர்ச்சி ...
• 
  மீண்டும் தயாரிப்பில் களமிறங்கும் ஹிருத்திக் ரோஷன்
• 
  இணையதள தேடல் : தீபிகா படுகோன்
• 
  கேரளாவை தொடர்ந்து ஹிந்தியிலும் சென்சார் போர்டு சிக்கலில் ஜானகி டைட்டில்

• 
  ஸ்பெயின் கார் பந்தயத்தில் மூன்றாமிடம்: அஜித் அணிக்கு உதயநிதி பாராட்டு
• 
  ‛மா இண்டி பங்காரம்' படப்பிடிப்பு இம்மாதம் துவக்கம்: சமந்தா வெளியிட்ட ...
• 
  துணிக்கடை திறப்பு விழாவில் கூட்ட நெரிசலில் சிக்கிக்கொண்ட பிரியங்கா ...
• 
  10க்கு 9 எப்பவுமே லேட் தான் ; இண்டிகோ விமான சேவை மீது மாளவிகா மோகனன் ...
• 
  வதந்திகளில் கவனம் செலுத்தவில்லை: காஜல் அகர்வால்