Dinamalar

'ஜகமே தந்திரம்' ஓடிடி ரிலீஸ் : சமாதானம் அடைந்தாரா தனுஷ் ?

கார்த்திக் சுப்பராஜ் இயக்கத்தில் சந்தோஷ் நாராயணன் இசையமைப்பில் தனுஷ், ஐஸ்வர்ய லட்சுமி மற்றும் பலர் நடித்துள்ள 'ஜகமே தந்திரம்' படம் ஜுன் 18ம் தேதி நெட்பிளிக்ஸ் ஓடிடி தளத்தில் வெளியாக உள்ளது.

தனுஷ் நடித்த 'அசுரன்' படத்திற்குப் பிறகு 'ஜகமே தந்திரம்' படத்தை தனுஷ் ரசிகர்கள் மிகவும் எதிர்பார்த்துக் காத்திருந்தார்கள். கார்த்திக் சுப்பராஜுடன் தனுஷ் இணையும் முதல் படம் என்பதால் கூடுதல் எதிர்பார்ப்பு இருந்ததே காரணம். கடந்த வருடம் மே மாதம் 1ம் தேதி இப்படம் வெளியாகும் என்று முதலில் அறிவிக்கப்பட்டிருந்தது. ஆனால் கொரோனா ஊரடங்கு காரணமாக அப்போது படத்தை வெளியிட முடியவில்லை.

தியேட்டர்கள் திறந்ததும் படம் எப்படியும் தியேட்டர்களில் தான் வெளியாகும் என்று காத்திருந்த தனுஷ் ரசிகர்களுக்கு ஏமாற்றமான ஒரு அறிவிப்பு வந்தது. படத்தை ஓடிடி தளத்தில் வெளியிடப் போவதாக அறிவித்தார்கள். படத்தைத் தியேட்டர்களில் தான் வெளியிட வேண்டும் என்று தனுஷும் பேசிப் பார்த்ததாகச் சொன்னார்கள். ஆனால், தயாரிப்பாளர் அவருடைய முடிவிலிருந்து மாறவில்லை.

இதனிடையே, 'மாஸ்டர்' படம் தியேட்டர்களில் வெளியாகும் என்ற அறிவிப்பு வந்த போது தனுஷ் டுவிட்டரில், “விஜய் சாரின் 'மாஸ்டர்' ஜனவரி 13ம் தேதி வெளியாகிறது. நண்பர்களுடனும், குடும்பத்தினருடனும் தியேட்டர்களில் படம் பார்க்கும் சினிமா காதலர்களுக்கு மீண்டும் அந்த கலாச்சாரத்தை வளர்க்க உதவும். தியேட்டர் அனுபவத்தைப் போல வேறு எதுவுமில்லை, அனைத்து பாதுகாப்பு முன்னேற்பாடுகளுடன் தியேட்டர்களில் படத்தைப் பாருங்கள்,” என குறிப்பிட்டிருந்தார்.

அதன் மூலம் 'ஜகமே தந்திரம்' படத்தை ஓடிடி தளத்தில் வெளியிடுவது பற்றிய தனது எதிர்ப்பைப் பதிவு செய்தார் எனச் சொன்னார்கள். அதோடு, படத்தின் தயாரிப்பாளரான சஷிகாந்த், டுவிட்டர் மற்றும் இன்ஸ்டாகிராம் தளத்தில் தனுஷை பாலோ செய்வதிலிருந்து விலகியதும் சர்ச்சையை ஏற்படுத்தியது. அவருக்கு எதிராக தனுஷ் ரசிகர்கள் கருத்துக்களைப் பதிவிட்டார்கள். அதன்பின் 'ஜகமே தந்திரம்' படம் பற்றி தன் டுவிட்டரில் தனுஷ் எதையும் பதிவிட்டதே இல்லை.

இந்நிலையில் இன்று ஜகமே தந்திரம் டிரைலர் வெளியானதும், அது குறித்து தன்னுடைய கருத்தைப் பதிவு செய்துள்ளார் தனுஷ். “தியேட்டர்களில் பார்த்து அனுபவிக்க வேண்டிய படம் நெட்பிளிக்ஸில் வருகிறது. இருந்தாலும் கூட நீங்கள் அனைவரும் 'ஜகமே தந்திரம்' படத்தையும் 'சுருளி'யையும் ரசிப்பீர்கள் என நம்புகிறேன்,” எனத் தன் கருத்தை வெளிப்படுத்தியுள்ளார்.

டீசர் வெளியான போது அதில் தனுஷ் பெயர் மற்றும் டெக்னீஷியன்கள் பெயர் இடம் பெறவில்லை. ஆனால், இப்போது டிரைலரில் அவற்றைச் சேர்த்திருக்கிறார்கள்.

• 
  பிராமணர்கள் குறித்து அவதுாறு கருத்து: மன்னிப்பு கேட்டார் 'மஹாராஜா' ...
• 
  விவாகரத்து நெருங்கிவிட்டது என பதிவு போட்ட ரசிகருக்கு சோனாக்ஷி கொடுத்த ...
• 
  100 கோடி ரூபாய் வீட்டிற்குக் குடிப்போகும் தீபிகா படுகோனே - ரன்வீர் சிங்
• 
  24 லட்சம் வாடகையில் புதிய அபார்ட்மென்ட்டுக்கு குடிபெயர்ந்த ஷாருக்கான்
• 
  ஜெய ஜெய ஜெய ஜெய ஹே ஹிந்தி ரீமேக்கை அமீர்கான் கைவிட்டது ஏன்? : நடிகர் புது ...

• 
  ஹீரோயின்களுக்கு முக்கியத்தும் உள்ள கேங்ஸ்டர் கதையை எழுதுங்கள் : ...
• 
  போய் வா நண்பா…ஒரு நாளில் ஒரு மில்லியன்…
• 
  கேங்கர்ஸ் Vs சுமோ - ரசிகர்கள் ஆதரவு யாருக்கு?
• 
  'குட் பேட் அக்லி' வினியோகஸ்தருக்கே 'ஜனநாயகன்' வினியோக உரிமை?
• 
  பிளாஷ்பேக்: விஜயகாந்த் ஜோடியாக நடித்த அனுராதா