Dinamalar

அரசியலில் இருந்து விலகிய பிறகும் விமர்சிக்கிறார்கள்: சிரஞ்சீவி பேச்சு

தெலுங்குத் திரையுலகத்தின் சீனியர் ஹீரோக்களில் ஒருவர் சிரஞ்சீவி. 2008ம் ஆண்டு பிரஜா ராஜ்ஜியம் என்ற கட்சியை ஆரம்பித்தார். 2009ல் நடந்த சட்டசபைத் தேர்தலில் இரண்டு தொகுதிகளில் போட்டியிட்டு திருப்பதியில் வென்று எம்எல்ஏ ஆனார். பின்னர் 2011ம் ஆண்டு அவரது கட்சியை காங்கிரஸ் கட்சியுடன் இணைத்தார். 2012ம் ஆண்டு ராஜ்ய சபா எம்.பி ஆனார். பின்னர் மத்திய சுற்றுலாத் துறை இணை அமைச்சராக பதவியேற்று இரண்டு ஆண்டுகள் அந்தப் பதவியில் இருந்தார். 2014 முதல் தீவிர அரசியலில் இருந்து ஒதுங்க ஆரம்பித்தார். அதன்பின் 2017ல் மீண்டும் நடிக்க வந்து அரசியலை விட்டு முற்றிலும் ஒதுங்கினார்.

இந்நிலையில் அரசியலை விட்டு ஒதுங்கிய பின்னும் தான் விமர்சிக்கப்பட்டு வருவதாக சமீபத்திய நிகழ்ச்சி ஒன்றில் பேசியுள்ளார்.

“அரசியலில் இருந்து முற்றிலும் விலகிவிட்டேன். ஆனால், சமூக வலைதளங்களில் சிலர் கடுமையாகவும், தவறான கருத்துக்களுடனும் விமர்சிக்கிறார்கள். ஆனால், அரசியல் விமர்சனங்களுக்கு பதிலளிக்க வேண்டிய அவசியத்தை நான் ஒரு போதும் உணரவில்லை.

நான் செய்த சேவையும், பெற்ற அன்பும் பாசமும் எனக்கு கேடயமாக உள்ளன. நான் செய்த நன்மைகளைப் பற்றி நான் பேச வேண்டியதில்லை, அவை தானாகவே பேசும். சில அரசியல் தலைவர்களும் என்னைத் தொடர்ந்து விமர்சிக்கின்றனர்.

ஒரு அரசியல் தலைவர் எனக்கு எதிராக தேவையற்ற கருத்துக்களைத் தெரிவித்திருந்தார். பின்னர் ஒரு இடத்திற்கு அவர் சென்ற போது, ஒரு பெண்மணி, அவரை உணர்ச்சி பொங்க எதிர்கொண்டு, நீங்கள் ஏன் சிரஞ்சீவியைப் பற்றித் தவறாகப் பேச வேண்டும் என்று கேள்வி எழுப்பினார்.

அந்த வீடியோவைப் பார்த்து அவரைப் பற்றி நான் விசாரித்து தெரிந்து கொண்டேன். பல ஆண்டுகளுக்கு முன்பு சிரஞ்சீவி ரத்த வங்கி மூலம் அவரது குழந்தையின் உயிர் காப்பாற்றப்பட்டதாகவும், அதனால், அவர் என்னை மிகவும் மதிக்கிறேன் என்றும் அவர் கூறிய வார்த்தைகள் என் இதயத்தைத் தொட்டன. அந்தப் பெண்மணி அப்படி கேட்ட பிறகு அந்த அரசியல் தலைவர் ஒருபோதும் என்னைப் பற்றி விமர்சிக்கவில்லை. அரசியல்வாதிகளுக்கும் இதயம் உண்டு. ஒருவேளை அவர் கோபத்தில் அப்படி பேசியிருக்கலாம். ஆனால், வீட்டிற்குச் சென்ற பிறகு அவரது மனைவி கூட இனி அப்படி பேச வேண்டாம் என்று கூறியிருக்கலாம்.

சமூக வலைத்தள விமர்சனங்களுக்கு நான் எப்போதும் பதிலளிப்பதில்லை. ஏனெனில் என் நற்செயல்களும், ரசிகர்களின் அன்பும் எனக்கு பாதுகாப்பாக உள்ளன. நான் செய்தவற்றைப் பற்றி நான் பேச வேண்டியதில்லை, அவை எனக்காகப் பேசும். அதுதான் உண்மை,” என்று பேசியுள்ளார்.

1998ம் ஆண்டு 'சிரஞ்சீவி தொண்டு அறக்கட்டளை' என்பதை ஆரம்பித்தார் சிரஞ்சீவி. ரத்தம் இல்லாமல் எந்த ஒரு உயிரும் போகக் கூடாது என்பதுதான் அந்த அறக்கட்டளையின் நோக்கம். ரத்த வங்கி, கண் வங்கி ஆகியவை அந்த அறக்கட்டளை சார்பில் நடத்தப்படுகிறது. அறக்கட்டளையின் இணைய தகவல்படி 9 லட்சம் யூனிட்டிற்கு அதிகமான ரத்தம் பெறப்பட்டுள்ளதாகவும், அதில் 79 சதவீதம் ஏழைகளுக்கு இலவசமாக வழங்கப்பட்டுள்ளதாகவும் குறிப்பிட்டுள்ளார்கள். 4580 ஜோடி கண்கள் தானமாகப் பெறப்பட்டு, அதன் மூலம் பார்வையற்ற 9,060 பேர் பார்வை பெற்றுள்ளதாகவும் தெரிவித்துள்ளார்கள்.

சிரஞ்சீவியைப் போலவே நடிகர் பாலகிருஷ்ணா அவர்களது குடும்பத்திற்குச் சொந்தமான பசவதாரகம் இந்தோ அமெரிக்கன் கேன்சர் மருத்துவமனை மூலம் ஏழைகளுக்கு இலவச மருத்துவ சிகிச்சை அளித்து வருகிறார்.

இவர்களைப் போல எந்த ஒரு தமிழ் நடிகரும் மருத்துவ சேவையில் இப்படி செய்ததில்லை என்பதை இங்கு குறிப்பிட்டாக வேண்டும்.

• செய்திகள்
• ஆல்பம்
• வந்த படங்கள்

• 
  அக்டோபர் 9ம் தேதி ஓடிடியில் வெளியாகும் வார்-2!
• 
  பாலிவுட்டில் அறிமுகமாகும் மீனாட்சி சவுத்ரி
• 
  ஹிந்தி பிக்பாஸ் சீசன் 19 நிகழ்ச்சியின் மீது 2 கோடி நஷ்ட ஈடு கேட்டு வழக்கு
• 
  ஏஐ தொழில்நுட்பத்தில் இரட்டை வேடங்களில் நடிக்கும் சன்னி லியோன்
• 
  50 ஆண்டுகளுக்குப் பிறகு ஒரிஜினல் கிளைமாக்ஸ் உடன் சர்வதேச திரைப்பட ...

• 
  சினிமாவிற்கு மொழி கிடையாது, தமிழிலும் நடிக்க ஆசைப்படும் பாக்யஸ்ரீ போர்ஸ்
• 
  சட்டப்படி பிரிந்தனர் : ஜிவி பிரகாஷ், சைந்தவிக்கு விவாகரத்து வழங்கியது ...
• 
  ஓவியா எங்கே? ஓவியாவுக்கு என்னாச்சு?
• 
  பிரபாஸ் படத்தில் இணையும் பிரேமம் பட நாயகி
• 
  இட்லி கடை, காந்தாரா 2 ஜெயிப்பது யார்?