Dinamalar

பிளாஷ்பேக்: “வேதாள உலகம்” வெற்றிக்குத் துணை நின்ற 'திருவிதாங்கூர்' சகோதரிகளின் நாட்டியம்

சிரிக்கும் விழி, சிருங்கார நாட்டியம், சீர்மிகு நடிப்பு, சிலை போல அழகு என அத்தனையும் ஒருங்கே அமைந்த நவரச நாயகிதான் 'நாட்டியப் பேரொளி' பத்மினி. அன்றைய திருவிதாங்கூர் சமஸ்தானமாக இருந்த திருவனந்தபுரம்தான் இவரது பூர்வீகம். இவருடன் பிறந்த லலிதா, ராகினி என்ற மற்ற இரு சகோதரிகளோடு தனது நான்காவது வயதிலேயே நாட்டியம் பயில ஆரம்பித்தவர் இவர். கதகளி, பரதம், மணிப்புரி, குச்சிப்புடி, மோகினியாட்டம் என அனைத்து வகை நடனங்களையும் முறைப்படி கற்று, பின்னாளில் கலையுலகினரால் 'நாட்டியப் பேரொளி' என அழைக்கப்பட்டவர். 'திருவிதாங்கூர்' சகோதரிகள் என அழைக்கப்படும் லலிதா, பத்மினி, ராகினி ஆகிய இம்மூவரும் சினிமாவில் நடிகைகளாக அறிமுகமாவதற்கு முன் நடன மங்கைகளாக, நாட்டியத் தாரகைகளாகத்தான் வெள்ளித்திரையின் வெளிச்சத்தில் பிரகாசித்து வந்தனர்.

உலகப் புகழ் பெற்ற நடனக் கலைஞர் உதயசங்கர் 'கல்பனா' என்ற பெயரில் நாட்டிய நாடகம் ஒன்றை சென்னையில் தங்கி, ஜெமினி ஸ்டூடியோவில் மூன்றாண்டு காலம் படப்பிடிப்பினை நடத்தி அதனை இந்தி திரைப்படமாக வெளியிட்டார். 'கல்பனா' படத்திலும், அவரது மற்ற நாட்டிய நிகழ்ச்சிகளிலும் அவரையும் அவரது மனைவியையும் தவிர இரண்டு இளம் பெண்கள் பிரதானமாக புகழ் பெற்று வளர்ந்து கொண்டிருந்தனர். 'திருவிதாங்கூர்' சகோதரிகள் என்ற சிறப்புப் பெயருடன் வலம் வந்து கொண்டிருந்த அந்த சகோதரிகளைத் தான் அடுத்து எடுக்க இருக்கும் திரைப்படமான “வேதாள உலகம்” திரைப்படத்தில் நடிக்க வைக்க விரும்பினார் ஏ வி மெய்யப்ப செட்டியார்.

அது சம்மந்தமாக அவர்களிடம் பேச, நாங்கள் 'திருவிதாங்கூர்' ராஜ குடும்பத்தைச் சேர்ந்தவர்கள். படத்தில் நடனக் காட்சி என்றால் மட்டும்தான் நடிப்போம் என அவர்கள் கூற, டி ஆர் மகாலிங்கம், யோக மங்கலம், கே சாரங்கபாணி ஆகியோர் நடிப்பில் வெளிவந்த “வேதாள உலகம்” திரைப்படத்தில் கதைக்கு சம்மந்தமேயில்லாத ஒரு நாட்டியக் கதையை உருவாக்கினார் ஏ வி மெய்யப்ப செட்டியார்.

“வாசமுள்ள பூப்பறிப்பேனே” என்று பாடிய படி தனது மனைவிக்காக பூப்பறிக்கப் போகின்றான் பாம்பாட்டி ஒருவன். புதரிலிருந்த பாம்பு அவனை கடித்து விட, கதறியபடி பாம்பாட்டியின் மனைவி பச்சிலைகளைப் பிழிந்து அவன் வாயில் ஊற்ற, பாம்பாட்டி பிழைத்துக் கொள்கின்றான். கிராமிய நடன பாணியில், அபிநயங்கள் மூலம் உணர்ச்சிகளை வெளிப்படுத்தக் கூடிய ஒரு சிறிய நாட்டியக் கதை உருவாக்கப்பட்டது. 'திருவிதாங்கூர்' சகோதரிகளில் சின்னவரான நடிகை பத்மினி பாம்பாட்டியாகவும், பெரியவர் லலிதா பாம்பாட்டியின் மனைவியாகவும் நடனமாடியிருந்தனர். 1948ம் ஆண்டு வெளிவந்த “வேதாள உலகம்” படத்தின் பிரதானக் கதையைக் காட்டிலும், இந்த நடனக் கதை அப்போது ரசிகர்களால் பெரிதும் விரும்பப்பட்டிருந்தது.

• 
  'பெங்கால் பைல்ஸ்' என டைட்டில் மாற்றப்பட்ட 'டெல்லி பைல்ஸ்'
• 
  தந்தையின் 70வது பிறந்தநாளில் 75 பாட்மின்டன் பயிற்சி மையங்களை துவங்கிய ...
• 
  250 கோடியில் வீடு கட்டிய பாலிவுட் நட்சத்திர தம்பதிகள்
• 
  தமன்னா நடிக்கும் 'விவான்' படத்தின் படப்பிடிப்பு தொடங்கியது!
• 
  முகமூடி அணிந்து ரசிகர்களிடம் நேரடியாக பட விமர்சனம் கேட்ட அக்ஷய் குமார்

• 
  ராம்சரண் தயாரிக்கும் முதல் படத்தின் படப்பிடிப்பில் தண்ணீர் டேங்க் ...
• 
  ஊர்வசி மறுத்திருந்தால் மகள் நடிகையாகி இருக்க மாட்டார் : கண் கலங்கிய மனோஜ் ...
• 
  ரிவால்வர் ரீட்டா படத்தின் ரிலீஸ் தேதி அறிவிப்பு
• 
  நாளை வெளியாகும் ‛குபேரா' படத்தின் டிரைலர்
• 
  ‛கூலி' படத்தின் தெலுங்கு வியாபாரம் தொடங்கியது